कैलाली- कैलालीको भजनी नगरपालिका र कैलारी गाउँपालिकाका अधिकांश गाउँ जलमग्न भएका छन् । कैलारी–५ का पुरानो मनिकापुरका १५ परिवार र पुरानो बहिसपुरका १५ परिवार बिस्तापित भएका छन भने वडा नम्बर ७ को बड्का वसन्ता र छुट्की बसन्ता गाउँ डुबानमा छन् ।

बडैपुरबाट आउने कटैनी नदीको बाढी गाउँमा पसेको कैलारी गाउँपालिका अध्यक्ष रामसमझ चौधरीले बताएका छन् । जोखिममा परेकालाई मध्यरातमा सुरक्षित स्थलतर्फ सारिएको उनले बताए ।

यस्तै, भजनी नगरपालिकाका सबै वडाका बासिन्दा डुबानबाट प्रभावित भएको नगरप्रमुख केवल चौधरीले बताए । कति घर डुबानमा छन् भन्ने यकिन नभइसकेको उनले बताए ।

आइतबार राति नै सुरक्षाकर्मीहरूले डुबानमा परेकालाई तीन वटा डुंगाबाट सुरक्षित स्थलमा सारेको कैलालीका प्रमुख जिल्ला अधिकारी धर्मेन्द्रकुमार मिश्रले बताए ।

उनका अनुसार रातिको तथ्यांकअनुसार १४१ परिवारका ५९१ जना विस्थापितलाई नजिकका विद्यालयमा सारिएको छ । अझै पनि कैलालीका विभिन्न नदीको सतह जोखिमको तह आसपास रहेको प्रजिअ मिश्रले बताए ।

निरन्तर परेको अविरल वर्षाको कारण कञ्चनपुर जलमग्न भएको छ । यहाँका अधिकांश पालिका डुबानमा परेका छन् ।

अहिलेसम्म कञ्चनपुरमा ४६६ परिवारका १ हजार ६२२ विस्थापित भइसकेको जिल्ला प्रहरी कार्यालय कञ्चनपुरका प्रहरी नायब उपरीक्षक उमेश जोशीले जानकारी दिए ।

उनका अनुसार जिल्लाको दोधारा चाँदनी नगरपालिका, भीमदत्त नगरपालिका, बेलौरी नगरपालिका, पुनर्वास नगरपालिका लगायतका क्षेत्र भारी वर्षाका कारण डुबानमा परेका छन् ।

डुबानमा परेका स्थानीयलाई सुरक्षित ठाउँमा सारिएको छ। उनीहरूलाई विद्यालय र आफन्तको घरमा राखिएको प्रहरीले जनाएको छ ।

डुबानमा परेकाहरुको अहिलेपनी उद्दार कार्य भैरहेको कंचनपुर प्रहरीले जानकारी दिएको छ । त्यस्तै कैलालीको धनगढी हुँदै कंचनपुरको पुनर्बास जाने सडक समेत बाढीका कारण अबरुद्ध भएको प्रहरीले जानकारी दिएको छ ।