नरेश प्रसाद जोशी दार्चुला — दार्चुला जिल्लाको लेकम गाउँपालिकाले हालै सार्वजनिक गरेको नयाँ लोगोमाथि बिबाद उत्पन्न भएको छ । गाउँपालिका वडा नं. ४ का अध्यक्ष महेन्द्र जोशीले उक्त लोगोप्रति तीव्र असन्तुष्टि व्यक्त गर्दै यसको तत्काल प्रयोग रोक्न आग्रह गरेका छन्। उनी भन्छन्, “हाम्रो पहिचानको मुटुमा चोट लागेको छ।”
जोशीले सार्वजनिक रूपमा दिएको अभिव्यक्तिमा लोगोले लेकमको ऐतिहासिक धरातल, सांस्कृतिक आत्मा र सामुदायिक चेतनाको स्पन्दन समेट्न नसकेको बताएका छन्। सामाजिक सञ्जालमार्फत उनले भनेका छन्, “गाउँपालिकाको सान र इतिहास बोकेको चिन्ह यस्तो हुन सक्दैन, जुन आफैंले आफ्नै अस्तित्वलाई ओझेलमा पार्दछ। यो हामीले स्वीकृत गर्न सक्ने अवस्था होइन।”
उनको आक्रोश यसबेला झन चुलिएको देखिन्छ, जब लोगो निर्माणको प्रक्रियामा स्थानीय तहका जनप्रतिनिधिहरूको सहमति, जनसरोकारवाला आवाज, र आवश्यक छलफललाई बेवास्ता गरिएको आरोप लागिरहेको छ। “लोकतन्त्र एउटा प्रक्रियाबाट जन्मिन्छ,” उनी भन्छन्, “तर यहाँ त केही व्यक्तिको मञ्जुरीमा हाम्रो पहिचानको निर्धारण गरिएको छ।”
अध्यक्ष जोशीको भनाइमा, लोगो डिजाइन स्थानीय माटो, संस्कृति र जनजीवनभन्दा टाढा रहेको, भावविहीन प्रतीक बनेको छ। “शायद डिजाइनरको आँखा आधुनिकताको धूलोले ढाकिएको थियो, त्यसैले उसले लेकमको माटोको सुगन्ध महसुस गर्न सकेन,” उनले गम्भीर कटाक्ष गरेका छन्।
उनले माग गरेका छन् कि लोगो जस्तो संवेदनशील विषयमा भविष्यमा कुनै पनि निर्णय लिँदा सबै वडाका प्रतिनिधि, स्थानीय नागरिक र सरोकारवाला निकायहरूको सहभागिता अनिवार्य बनाइनुपर्छ। “हामी लड्नेछौं, बहस गर्नेछौं, तर आफ्नो पहिचानको मोल भने सस्तोमा बेच्न दिने छैनौं,” उनले भने।
गाउँपालिकाले भने लोगो निर्माण प्रक्रिया विधिसम्मत भएको दाबी गर्दै कार्यान्वयनको तयारी गरिरहेको अवस्थामा सार्वजनिक रूपमा उठेको यस्तो असहमति स्थानीय लोकतन्त्रभित्रको गहिरो दरारको संकेत हो, जसले एकताको नारा दिन्छ, तर प्रक्रियामा बहसको आवाज नसुनिने बनाउँछ।
