धनगढी: धनगढीमा प्रेमपत्र प्रतियोगिता हुने भएको छ। फागुन २ गतेका दिन भ्यालेन्टाइन दिवसको अवसरमा प्रेमपत्र प्रतियोगिता हुने भएको हो। मङ्गलबार पत्रकार सम्मेलन गर्दै सुदूर चौतारीले प्रेमपत्र प्रतियोगिता गर्ने जानकारी गराएको हो।
प्रेम दिवसको नाममा विभिन्न अश्लिल गतिविधिहरू तथा समाजमा बढ्दै गइरहेको विसङ्गति विरुद्ध रहेर केही नयाँ काम गर्ने उद्देश्यले सुदूर चौतारीले यस्तो कार्यक्रम आयोजना गर्न लागेको कार्यक्रममा बोल्दै सुदूर चौतारीका व्यवस्थापक प्रेम बिवस चन्दले बताए।
आयोजक सुदूर चौतारीले प्रेमपत्रमा प्रेमपात्रका रूपमा प्रेमी-प्रेमिकाका साथै जन्मदिने आमाबुबा, देश, प्रकृति सम्बद्ध विषय खोलानाला, चराचुरुङ्गी, बोटबिरुवा, डाँडाकाँडा, आफ्नो गाउँठाउँ, मौलिक संस्कृति, परम्परा आदि राख्न सकिने बताएको छ। प्रेमपत्र बढीमा एक हजार शब्दको हुनुपर्ने, पत्र टाइपिङ वा हस्तलिखित जस्तो भएपनि हुने र प्रेमपत्र इमेल , ह्वाट्सप वा स्वयम् आएर (आर आई एफ टी फेसन) धनगढी २ एसपीए रोड मा समेत मार्फत पठाउन सकिने आयोजकले जनाएको छ।
आयोजकले प्रेमपत्र पठाउन जिमेल र ह्वाट्सप नम्बर सार्वजनिक गरेको छ। [email protected] अर्थात् ह्वाट्सप नम्बर ९८४८९८३८८० मा पठाउन सकिने जानकारी दिएको छ।
प्रतियोगितामा भाग लिन चाहने व्यक्तिले माघ २९ गतेभित्र आयोजकलाई इमेल वा ह्वाट्सप मार्फत प्रेमपत्र पठाइसक्नुपर्ने छ। प्राप्त भएका पत्रमध्ये उत्कृष्ट १० पत्र लेखकलाई प्रेमपत्र प्रतियोगिता २०८० को फाइनल कार्यक्रममा वाचन गर्न लगाइने र उत्कृष्ट १० मध्ये प्रथम, द्वितीय र तृतीय पत्रलाई नगद र उपहारसहित पुरस्कृत गरिने आयोजकले जानकारी दिएको छ।
