सुदूरपश्चिम प्रदेशमा सत्ता समीकरण फेरिएसँगै नेपाली कम्युनिष्ट पार्टी (नेकपा) का खगराज भट्ट नयाँ मुख्यमन्त्री बन्ने भएका छन्। निवर्तमान मुख्यमन्त्री कमलबहादुर शाहले राजीनामा दिएपछि प्रदेशमा नयाँ सरकार गठनको प्रक्रिया अघि बढेको हो।
प्रदेश प्रमुख नजिर मियाँले संविधानको धारा १६८ को उपधारा (२) बमोजिम नयाँ मुख्यमन्त्री नियुक्तिका लागि शुक्रबार बिहान ११ बजेसम्म दाबी पेस गर्न समय दिएका छन्। नेकपा नेता भट्टले नेकपा एमालेको समर्थनमा तोकिएको समयभित्रै मुख्यमन्त्रीमा दाबी पेस गर्ने तयारी गरेका छन्।
दाबी पेस भएपछि प्रदेश प्रमुखले भट्टलाई शुक्रबार नै मुख्यमन्त्री नियुक्त गर्ने तयारी गरेका छन्। नेकपाका एक सांसदका अनुसार बिहान ११ बजे नियुक्त भएपछि दिउँसो ३ बजे मुख्यमन्त्रीको सपथ ग्रहण कार्यक्रम तय गरिएको छ।
मुख्यमन्त्री नियुक्त भएलगत्तै भट्टले सानो आकारको मन्त्रिमण्डल विस्तार गर्ने सम्भावना पनि रहेको नेताहरूले बताएका छन्। नेकपा र एमालेबीच यसअघि नै मन्त्रालयको भागबण्डामा सहमति भइसकेको छ। सहमतिअनुसार नेकपाले मुख्यमन्त्रीसहित चार मन्त्रालय तथा एमालेले तीन मन्त्रालयको जिम्मेवारी पाउनेछ।
एमालेले आर्थिक मामिला, सामाजिक विकास तथा वन वा कृषि मन्त्रालयमध्ये एउटा मन्त्रालयको नेतृत्व पाउने स्रोतले जनाएको छ। यसअघि गत असार ३१ गते एमालेले बजेटप्रति असहमति जनाउँदै कमलबहादुर शाह नेतृत्वको सरकारलाई दिएको समर्थन फिर्ता लिएको थियो। समर्थन गुमेपछि दबाबमा परेका शाहले बिहीबार प्रदेशसभालाई सम्बोधन गर्दै पदबाट राजीनामा दिएको घोषणा गरेका थिए।
<span;>त्यसपछि उनले प्रदेश प्रमुखलाई औपचारिक रूपमा राजीनामा पत्र बुझाएसँगै नयाँ सरकार गठनको बाटो खुलेको हो। अब नेकपा–एमाले गठबन्धनको समर्थनमा खगराज भट्टको नेतृत्वमा सुदूरपश्चिममा नयाँ सरकार बन्ने भएको छ।